Творчая гасцёўня да Міжнароднага Дня роднай мовы адбылася на Краснапольшчыне. Родная мова – найгалоўнейшая наша спадчына. Яна замацоўвае ў матэрыяльнай форме індывідуальную і грамадскую свядомасць чалавека.
“Міжнародны расійска-беларускі конкурс аматараў літаратурнай творчасці “Мы на матчынай мове жывём” – гэта наш узнёсак у захаванне родных моў, сродак іх папулярызацыі, сродак міжнароднага ўзаемадзеяння і супрацоўніцтва”, – паведала арганізатар конкурсу, кіраўнік народнага літаратурнага калектыву “Світанак” Валянціна Марчанка.
У 2024 годзе ў конкурсе прынялі ўдзел як творцы з расійскага боку, так і з Беларусі. На конкурс паступіла 65 твораў ад 31 удзельніка. Пераможцы былі ўзнагароджаны дыпломамі сектара культуры Краснапольскага райвыканкама.
Як міжнародны, конкурс прайшоў у чацвёрты раз і зноў даў магчымасць выказацца аматарам-аднадумцам мастацкага слова, падзяліцца сваёй творчасцю, быць пачутымі.
Лепшыя конкурсныя творы ў выкананні аўтараў і артыстаў раённага Цэнтра культуры гучалі на працягу ўсяго мерапрыемства.
Аляксандра Амельчанка. Фота аўтара.
